III Encontro Galego de Consellos Locais de Participación infantil e Adolescente

UNICEF Comité Galicia impulsa a iniciativa Cidades Amigas da infancia co obxectivo de promover a aplicación da Convención sobre os Dereitos do Neno (CDN) a nivel municipal nos municipios galegos.

Os próximos días 18 e 19 de novembro organizamos o Terceiro Encontro Galego de Consellos Locais de Participación Infantil e Adolescente. Despois da edición de 2021, que tivemos que realizar en liña debido á COVID-19, este ano esperamos con ilusión reencontrarnos de xeito presencial!

Nesta ocasión a temática central a traballar será a protección e a prevención da violencia contra a infancia e a adolescencia, no marco da actividade “O mural dos dereitos” proposta por Cidades Amigas da infancia para celebrar o Día Mundial da Infancia (20 de novembro).

Obxectivos do encontro

  • Contribuír ao exercicio do dereito dos nenos, nenas e adolescentes a participar en todo o que lles afecta, poñendo en valor o seu dereito a opinar e ser escoitados.
  • Intercambiar experiencias e coñecementos entre diferentes consellos de participación infantil e adolescente dentro da comunidade autónoma.
  • Fomentar un clima de respecto e protección dos dereitos da infancia e a adolescencia a nivel local, fomentando contornas seguras e protectoras.
  • Reforzar unha visión do municipio como protector dos dereitos da infancia.
  • Alcanzar como grupo, puntos de acordo e definir unhas conclusións comúns do encontro para a elaboración do III Manifesto da Infancia en Galicia que logo será trasladado ás administracións públicas.

Datos organizativos

Data

18 e 19 de novembro de 2023

Lugar

Residencia de Tempo Libre do Carballiño (Avda. do Parque s/n, 32500 O Carballiño, Ourense.)

Horario

Do sábado ás 10:00h ata o domingo ás 15:00h

Destinatarios

50 nenos, nenas e adolescentes dos Consellos Locais de Participación dos concellos de Galicia.

Inscricións

Para poder asistir ao Encontro cada consello de participación debe ter en conta que:
  • Cada consello estará representado por catro nenos, nenas e adolescentes entre 10 e 17 anos. Recomendamos que a selección dos nenos e nenas responda ao consenso e a unha selección o máis democrática posible.
  • Cada consello estará acompañado por unha persoa adulta de referencia responsable do grupo.
  • Cada consello comprométese a trasladar os acordos e conclusións alcanzadas durante o Encontro aos seus compañeiros/as e representantes políticos.
  • Cada concello financiará cos propios recursos os desprazamentos da delegación do seu municipio. Estes traxectos deben estar axeitadamente cubertos polos seguros correspondentes, baixo a responsabilidade de cada municipio.
  • A organización cubrirá os gastos de estancia e manutención dos participantes e da persoa adulta acompañante de referencia.
  • Será obrigatorio que a persoa adulta de referencia que os acompañe durante o Encontro subscriba o protocolo de protección para o evento (documento de pautas de salvagarda).
  • Para a participación no Encontro é imprescindible que os nenos, nenas e adolescentes teñan a autorización correspondente debidamente cumprimentada.
  • Prazo de inscrición: Ata o 10 de novembro para cumprimentar o formulario de inscrición e os correspondentes modelos de autorización.

Para calquera dúbida podes contactar con: galicia@unicef.es

Organiza

UNICEF Comité Galicia coa colaboración da Consellería de Política Social da Xunta de Galicia

Últimas noticias

Ir al contenido